【日本地震：超市主動減價惠災民 VS 香港打風：防風皺紋膠紙炒貴幾倍】

上星期五，超級颱風「山竹」未吹到黎，我地已經見到香港各區文具鋪，紛紛趁機將原價十零蚊一卷皺紋膠紙抬價，上晝賣二十幾，下晝已經賣五十幾（註一）。比起網上二手交易平台，某名校出身前ibanker試圖以八十蚊癲價出貨，呢堆街坊小店定價已經十分克制，充份體現「街坊小店濃濃既人情味」！

香港人擅長靈活走位，個個都想憑著超級颱風發個小財。文具店中年東主同ifc青年財俊，呢一刻不分藍絲黃絲、摒除世代隔膜。「獅子山精神」與「中環價值觀」殊途同歸。

睇返九月初，日本北海道地震。札幌有大型超市將礦泉水、拉麵等生活必需品一律減價，低至100-200yen賣畀災民（註二）。亦有溫泉酒店自覺因地震而怠慢客人，主動減收費用。

日本，每一次天災人禍，國民仍然安靜排隊，市面井井有條，無「打砸搶燒」。超市、便利店唔會有民眾哄搶；酒店、食肆亦唔會坐地起價。種種違反人類天性既行為，地球上極為罕見。

有人話，呢個現象，源於日本人習慣長期壓抑真性情（i.e. 虛偽）。佢地人性陰暗面未顯露出黎，只係當前危難未觸動到佢地底線、未逼使佢地放棄假面具之嘛！

呢一點我認同架。

之但係，一地之民有良莠，總有自私自利之徒。去到核電廠爆炸咁大件事都未令呢班人「跳制」暴走。（反觀香港，風都未黎就個個趁機想發災難財！）好明顯，呢個係社會整體水平高低，以及民族性優劣既分別啦！

Btw，根據美國National Oceanic and Atmospheric Administration（NOAA）網頁FAQ，痴膠紙係「浪費精力、時間同膠紙」（註三）。大家如果真係驚風大，會爆玻璃，不如搵木板遮住隻窗啦。

註：

1. 〈全民搶購膠紙貼窗 傳炒到$80一卷〉，蘋果日報，2018–9–14

2. http://www.facebook.com/story.php?story_fbid=1897150667247551&id=396706110414350

3. http://www.aoml.noaa.gov/hrd/tcfaq/C7.html

(2018–9–17)

傳送門：西米Go昔日文章