Member-only story
DAAD (http://www.daad.de/) 會列出邊D院校會提供英文授課的學士同碩士課程。除左介紹課程內容之外，網頁都會列出其收生要求：包括學業成績、英語語文能力、及其他額外要求等等。
大家唔好單單相信DAAD所列出資料，必須再去心儀學校既網頁了解清楚，因為好多時，某課程會係本身學校收生要求外，再有額外要求。係度提一提，大家必須要留意「所有」收生要求。德國人處事好嚴謹，只要其中一樣唔符合，都唔會再處理你的申請，有乜唔清楚的話，最好方法就係直接電郵比有關學院/學系。
（注意：以下資料只供參考，不保證完全正確，如有疑問請向相關大學或所屬機構查詢。）
間間大學要求申請人遞交的文件都唔同，係呢到只係會講一D近乎必要的文件，要知清楚都係查番個別網頁。
首先係學業成績，報學士就要交DSE成績。可以放心，德國大學已經接納香港DSE，唔使申請人再報考任何能力試，就已經有資格申請德國的學士課程。
如想報讀碩士，當然本身要有學士學位。如果你持有香港果九大既學位，就一定承認。公開大學、樹仁大學、演藝學院、甚至珠海學院所發出的學士學位，德國大學都一樣承認。如果你持有其他國家大學所發出的學位而又想知德國承唔承認，可以去以下網頁查閱 （注意只有德文，請自行google translate）：
（左邊選擇institutionen，選擇suchen，再輸入國家同大學名稱搜尋。）
既然課程係以英語授課，當然要有英語能力證明。最簡單係IELTS或者TOEFL，唔同大學有唔同的接納標準，例如要至少達到某一成績先接受。
申請讀碩士的人要留意，好多大學都指出，如果你所獲得的學士學位係以英文授課，就可以唔需要再提交證明。大家知道，係香港教援既學士課程，絕大部分都係以英文授課。但問題係要點證明呢？老實講，我都唔知。我搵番張畢業證書同成績單，都無寫明係以英文授課（可能香港的大學已經將英文授課當作理所當然，所以無寫係任何文件）。
我自己有IELTS，所以直接以IELTS做證明。要留意有個別院校會要求成績必須係近期發出，例如三年內或五年內。
除此之外，就係你持有的學士學位同報讀既碩士課程係咪相關。DAAD網頁所用的字眼為「in a related field」 。係香港，碩士學科可以同本科完全唔同，但係德國就唔可以。
咁點為之in a related field？大學會列出接納的學科，你睇返你主修科目係咪佢列出的學科入面。另外，佢地都會要求申請者提交成績單加上課程表，等大學自行決定是否相關。有時，會要求申請者必須係不同範疇上修讀過幾門課，並係成績單中特別指出。
當然，係咪相關，最後都係睇返大學接唔接受你所提供的資料。
除左上面所講近乎必須的文件之外，唔同大學都會有各自的要求（多數都係要求碩士申請人），例如：要有GMAT (Graduate Management Admission Test) 成績、要有工作經驗、要提交reference letter等等，呢到就唔詳細討論，各位請自行查詢。
大家都見到，有部分文件係需要時間準備，要預時間考試。所以大家想去德國升學既話，最好先一早了解清楚心儀課程的收生要求，有乜野唔清楚，就盡早電郵查詢。
下一次，我會講下另一個重要步驟：文件認證。
(2017–12–30)
傳送門：西米Go昔日文章
傳送門：80後出走德國去讀書系列
