Member-only story
一個人，時間有限、精力有限，盤生意去到咁上下，就算家爺仔也母全部落晒場，都無可能顧晒咁多瓣野。That’s why，一間公司要越做越大，老細就局住要請人幫手：務求出一蚊糧，做十蚊生意，可以賺多九蚊，打埋算盤除笨有精。
正常心智既人，都想買靚貨，老細都一樣，梗係想搵到fit馬返黎，做野有擔戴、起貨快靚正；無理由想養一堆下駟，甩甩漏漏架嘛。當然，價錢都係一個好重要既考慮。呢個我地明既！邊個唔想「燒鵝脾既味道，豆腐渣既價錢 」先？
話說，某公司有個部門，工作性質唔使講teamwork，各人獨立工作，人工就同output掛鉤，可以話屬於多勞多得既性質。其中有個員工，正處博殺年紀，往往lunch都唔使食，都要超額完成工作。雖然，佢既工作能力，係有少少將其他同事比下去，之但係「兄弟爬山，各自修行」，反正條數都係自己既，大家都無話/無得眼紅。而上頭見佢咁肯博，又隨時候命，一直以黎幫手解決唔少問題，都有讚無彈。
只不過，老細諗野就寧舍唔同。佢見呢位同事咁fit，就專塞麻煩野畀佢。起初佢以為老細考佢牌，都好落力搞掂。搞好之後，老細往往搵籍口，將個唔再麻煩既job交畀其他人跟，再塞另一樣麻煩野畀佢。如是者，一年兩年三年，呢位同事永遠都為他人作嫁衣裳，輕鬆日子無黎過，野做得比人多好多，人工又唔見得多過其他人好多喎。
「再熱血既心，都有冷卻一日。」之後，公司留唔住隻fit馬。又剩底一堆唔係點願跑既下駟。
呢位老細當員工係蜘蛛俠，行「能力越大，責任越大」呢一套，造就汰強留弱既生態，間公司唔會有前途。
#老細 #能力越大責任越大
(2018–4–22)
傳送門：西米Go昔日文章
