Member-only story
西米曾經跟過一個老細，算叫做識於微時，係佢剛剛過左最霉，搵朝唔得晚既日子，岩岩接到大客無幾耐，就開始跟佢搵食。
果陣佢生意未上軌道，公司都係摸著石頭過河，接返黎既生意大家都係邊試、邊學、邊做。果陣既老細好闊卓、好大方，OT有錢畀，開夜有雙工，例牌請我地一齊食早餐同食晏，開得夜既話仲會收工之後一齊去打邊爐。
作為員工，我地識得感恩，亦識得計數，大家都一心為公司好，望既係好似十幾年前買股王騰訊咁，希望同公司一起成長。
果一年黎，果位大客畀公司既生意幾何級數咁爆上，仲由短期訂單，變做長期合約。但西米察覺老細就越黎越孤寒：OT cut左、開夜既工時長左但補貼一樣……去到年尾，分到既花紅仲要只係三千蚊！（而另一個同期同事仲陰公，只分到一千蚊……大佬，一千？唔撚係呀……）
西米唔服，直接問老細點解。佢話：「我呢D細公司，係畀到咁多，你出面有路數既我唔會阻你。」
說話講到咁白。Fine。即走。
人地越王勾踐等到飛鳥盡，先會良弓藏。你江山都未穩就現形，會唔會早左d呢？
#不可共富貴 #老細
(2018–3–26)
傳送門：西米Go昔日文章
