Member-only story
中國人基於安全考慮，將身家財產搬離中國都唔係咩新聞。早幾年尖沙咀廣東道，樓下名店大堆中國大媽排長龍買「包包」，樓上保險公司office就有土豪不斷碌卡買「理財產品」（因為佢地既信用卡每次簽帳有上限，所以買大額既保險，佢地要碌完又碌，聽講一個客由朝碌到晚並唔罕見）。同期，香港各區外資銀行分行，亦不時見到操普通話人士，拎住一袋二袋現金要開戶口。（唔好問我點解，我地入十萬八萬港紙都畀銀行職員問長問短，驚死係拉登，但係班土豪一袋二袋人民幣就無事。）精明既前線sell屎，因而流傳一個不明文規矩：中國人黎到，要先買product，後開戶……
話說，近日我朋友去某本地大銀行想開戶口，負責接待既職員三句唔埋就力sell佢地既「儲蓄計劃」。其實，我朋友都預左呢一趟實會畀人sell野，之但係，呢類回報低、年期長、缺乏彈性（簡單講：無野好）既product，佢實在毫無興趣，所以表明買唔落手。我朋友都明白，對方係為搵食、求跑數，所以佢反問對方，有無其他產品介紹返？例如人壽/意外保險、投資基金之類。
可能因為佣金唔夠豐厚，又或者呢類product並唔係公司力捽既數。銀行職員竟然暗示，客戶要幫襯上述「儲蓄計劃」，先證明到佢開戶口目的真係「儲蓄用途」，先可以成功開到儲蓄戶口。
原來，「買product先開到戶口」呢個都市傳說係真架，而家仲要唔係只適用於中國人添。又一次證明香港地既sell屎，真係乜做得出。
我睇返網上論壇，原來呢種風氣唔係咩新野，都開始左幾年，連學生哥、師奶都有中伏。另外，有業界人士指出，開戶口同買產品其實互無影響。客戶如果覺得「儲蓄計劃」唔適合自己，或者根本唔想買，可以係二十一日冷靜期內，向銀行指示終止保單即可。（當然，當初應承買產品之前，要問清楚有無冷靜期啦！）
By the way，呢類「儲蓄計劃」其實係有投資成份既保險。運作係客戶月供幾年（e.g. 5年），若干時間之後（e.g. 10年之後）就可以拎返本金同分紅。你越遲拎分紅越多，但提早拎（e.g. 5年內）就會有高昂手續費。計劃同時都附有人壽/危疾保險，期間客戶出事會有賠償。
呢類「儲蓄計劃」，回報/分紅無保證，當你質疑佢回報太低，Sell屎標準答案就係：「其他金融產品既回報雖然較高，但我地果個包埋保險喎。」當你質疑佢保費太貴，佢就會話：「佢唔止係保險，仲係儲蓄計劃，之後你可連本帶利全數拎得返。」總之，講到公你贏，字你都贏，無得輸咁啦。實情呢……
我只會話「邊有咁大隻蛤乸隨街跳」，真係咁著數，保險經紀/銀行sell屎一家all in左未？
(2019–10–18)
傳送門：西米Go短評 #001–100，#101–200，#201–300
傳送門：我聽不懂，為什麼你不「梳中雲」？
