Member-only story
為左千秋萬代，中國政權不嬲都有鎖國傳統。遠既唔講，明清兩朝都有海禁：官府嚴禁百姓出海、唔畀製造大體積船隻、又強制沿海居民遷入內陸。呢個禁令一直到清末，朝廷唔夠外國打，先局住開放港口畀洋人入黎。
到共產黨掌權，毛澤東又一次全面閉門。時至今日，「自由意志」成為習近平眼中最大威脅，因此，要資訊封鎖，佢地網絡長城越黎越完善；敏感詞條list越黎越長；外國傳媒/網絡企業越ban越多；書籍/電影/電視/網上內容審查越收越緊……總之乜都要「牢牢掌握」係黨手中。中國本身已變成全球最大「內聯網」。
大家上網目的係為搵資訊，搵資訊就要靠search engine。咁重要既把關工作，中國政府梗係唔會假手於人。Google同Yahoo神早就畀佢地踢出局。外資黎講，得返Bing（係中國叫「必應」，其實呢個譯名幾好，譯音又譯意，你搜尋野即係「有求」，佢就「必應」）先可以係呢個「內聯網」生存。因為，只有Microsoft肯全面配合中共既審查要求。
不過，班中國網民唔好開心住，由一月二十四日開始，必應都用唔到啦！點解？因為有人不滿係百度搵野，唔係出廣告，就係出返百度旗下媒體公司既文章（i.e. 幫自己公司刷click rate），D搜尋結果九唔搭八兼無鬼用。佢寫左篇文叫「百度已死」，誰不知一呼百應，搞到大量百度用戶轉會用Bing。
中國政府不嬲最驚中國人萬眾一心，怕佢地團結起黎反佢枱。有理無理，而家拿拿聲「IP屏蔽」定先。另外，中國人最講親疏有別，外資再聽話，都只係外人，又點可以畀Bing係國內掘起，挑戰百度search engine一哥既地位呢？
Trump搞貿易戰，其中一個原因就係中國無真正開放市場、無公平貿易。今次中共屏蔽必應，完美示範咩叫「為敵人提供子彈」咯！
#百度已死 #Bing亦亡 #還有甚麼可以用
(2019–1–27)
傳送門：西米Go昔日文章2019
傳送門：【請不要在店內打嗝或者放屁】
