【形同虛設】機管局明文規定商戶產品售價不可高過市區，but……

機管局2004年推出「市區價格保障機制」（註），保證機場貨價不高於該零售商的市區分店，否則消費者有權在購物後三十天內，連同購物收據正本等資料，寄予機管局，經核實後可獲零售商安排退款。

只不過一如香港眾多條例一樣，你有你規定，佢有佢走法律罅。例如咁……

1. 改店名：
   機場果間叫「I Love 翠華」，出面果堆叫「翠華」；機場果間叫「美心。翠園」，出面果堆叫「翠園」。（唔同名，就算係唔同鋪頭，就唔受機制保障。）

2. 綑綁銷售：
「味千拉麵」機場分店既麻辣牛肉拉麵，會配薯餅出售，賣$105，比出面單買拉麵，貴差不多一倍。（個餐唔完全一樣，又唔受機制保障。）

3. 直接無視規定：
「太興」燒鵝髀飯，機場賣$87，出面賣$85；雙拼飯亦是機場分店貴$2。（可能佢覺得顧客唔會為左兩蚊差價，而畀兩蚊郵票寄信去機管局claim掛。）

有人會話，呢個「市區價格保障」原意唔係for餐飲業既。但根據上面既邏輯，機場LV只要連埋一張「廁紙」綑綁式銷售，已經同市區分店所賣既野不能直接比較，可以無視機制任定價錢。

我就唔覺得機管局真係有心想保障消費者 。可能當年正值沙士之後，出面公私營機構為左谷起經濟，大搞形象工程，佢頂唔住旅遊業界/政府壓力，要扮下野、做個樣吸引人消費。加上佢地係山寨王，不嬲唔使向市民問責，好似其他公營機構咁：「講左就等如做左」，有無成效關人仁事既官僚心態。

你明知個機制漏洞多過乜都完全唔理，十四年黎唔去堵塞漏洞，又唔去監管租戶。好心機管局不如直接取消呢個所謂「規定」算啦，好過擺個假野係度呃人啦。

#HongKongAirport #AirportAuthorityHongKong #官僚

註：

http://www.hongkongairport.com/chi/shopping/price-guarantee.html

(2018–1–21)

傳送門：西米Go昔日文章