Member-only story
「有橫練功夫之人，身上必有個功夫練不到的罩門，這地方柔嫩異常，一碰即死。」
— 〈射雕英雄傳〉，第四回「黑風雙煞」，金庸
香港不愧係地球上IQ最高地區（註一），睇下呢三個幾月，香港人進化得幾快。六月初，班村民仲係條街行行企企，唱歌大合照。今日，已經識得拎起工具打怪獸。儘管有時候做法不完美，但可接受，亦有改善。大惡龍派出四大爪牙入村生事，佢地各有罩門。勇者們要贏，就要對準呢D罩門，大大力踢落去。
C級怪：藍絲廢老
最低級既嘍囉係愛國藍絲，以中老年人為主，平時睇開無線、東方、頭條，中晒惡龍幻術，缺乏獨立思考能力。佢地信奉「食鹽多過你食米」論，凡事愛認叻。呢班人係廢，但數目繁多，親戚/同事之中總有幾個。
愛國藍絲既口頭禪係「守法」、「唔好搞搞震」，經常「邊走邊『小』」。有時係火車地鐵站充當「護閘手」，早晚捉人跳閘（同時搶人銀包、非禮異性）；有時走去清理「連儂牆」（順便打人）。佢地雖然戰鬥力非常低，但持住警察縱容，黃絲善良忍讓，初時頗為橫行無忌，直至近日，黃絲習得神獸召喚技能，才幾乎絕跡。
藍絲廢老有權力崇拜DNA，認同「誰大誰惡就誰正確」，同佢地講道現係無作用架。你惡過佢，佢地就會收皮。
B級怪：黑社會、鄉巴佬、福建幫
古惑仔從來只會收錢做野。元朗鄉黑拎起籐條、北角福建幫著住件「為所欲為tee」，都係接job、做freelance。撐乜撐物，who fxxking care。
呢班人行判上判制度：金主出offer畀地區勢力人士；勢力人士憑人脈係區內搵「蛇頭」；「蛇頭」搵「艇仔」；「艇仔」招爛仔。一層落一層，中間人介紹到幾多人「幕前演出」，就食幾多個人頭既差價。做得中間人，多數都係已上岸，或半上岸。佢地錫身，平時唔會輕易落場演出，接job返黎叫人做，自己純抽水就算。係遇著「元朗721」呢類「國家任務」，先會粉墨登場。
爛仔命賤，勇者們無謂瓷器撼缸瓦。搞掂班中間人先係對準根源。佢地通常係自己地盤，開下食肆、酒吧、麻雀館、車房、拳館之類低技術含量既正行生意。其中荃灣二坡坊就係例子。
唔好睇佢地平日蝦蝦霸霸，其實得個殼。以前示威者斯斯文文，佢地就拎刀斬人；而家蒙面人發惡，玩快閃「裝修」，就即刻笠水跪底（註二）。點解？做完衰野，人可以避風頭，間鋪搬唔走。蒙面人在暗，鋪頭在明，如果為啖氣企硬，好肯定「裝修」陸續有黎。到時一係再使錢請人護鋪，一係自己硬食「裝修費」，多多freelance錢都要嘔突，得不償失。
黑社會既罩門就係呢度，但要留意返，佢地有一定戰鬥力，各位勇者如果level/人數不足，切勿輕言挑戰。
（待續）
註：
- 〈2018全球最高IQ地區 第一位係？講你都唔信〉，Economic Digest，2018–6–13
- https://www.facebook.com/groups/347732012087504/permalink/1116899791837385
(2019–10–8)
傳送門：西米Go短評 #001–100，#101–200，#201–300
傳送門：【大紅龍與四大爪牙的罩門】（下）
