Member-only story
「遊行示威」要有效果，就先有一個假設：
當權者太離地，聽不到國民既聲音。國民透過遊行集會、沿途大叫口號，希望能夠叫醒政府，並用選票逼使佢地回應訴求，令到錯誤既政策重回正軌。
香港現今種種社會問題，過去二十年都已經係立法會討論過；係和平、理性、非暴力既靜坐同集會表達過；係激烈既遊行同示威當中衝突過；以至佔中期間，催淚彈都出過……反反覆覆三幅被，講到口都臭。市民既聲音，連外國傳媒都廣泛報道，政府官員又點會聽唔見？正所謂「扮訓既人叫唔醒」。佢地之所以一直知而不改，只得兩個原因：「不為」及「不能」。
97主權移交初期，為左保存一國兩制呢個示範單位畀台灣同國際社會睇，市民反對既聲音，中共同香港政府都仲有回應下。自從中國富起來而變得財大氣粗，過去所用既安撫懷柔政策就開始轉向。尤其習近平上場之後，對香港既態度只有順我者昌、逆我者亡。我地睇到既係，一眾香港官員只識跟隨中共指令，推行任何政策都不能偏離，亦無商量餘地。
2017年，DQ議員缺乏法律理據咩？就用人大釋法去搬龍門，令法律為政治服務。2018年，有市民問可唔可以減少輸入中國人黎香港，以減輕房屋需求壓力咩？林鄭月娥即刻上綱上線到國家主權層次，連違反 《基本法》27條（港人享有言論自由）都不顧，中共未出聲，自己率先自劃禁區，話「每日150單程證輸入」係「紅線」，說不得。（紅線？你話係就係架拿？詞窮既林鄭狗急跳牆，真係乜都up得出！）
香港，因為缺乏真正既選舉，特首同一眾問責官員既政治前途，並唔係掌握係市民手上。就算民意反彈，演變成佢地口中既暴亂，佢地都可以無需作出任何妥協。無論你動員到幾多人出黎、叫得幾大聲都好，佢睬你都有味！
係呢個政治現實下，我想請問，年年六四、七一、十一都搞遊行集會既搞手、事無大小都叫人出黎上街既政客，今時今日，如此「行禮如儀」式抗爭，還有作用嗎？
永遠都係終點宣佈「畀D掌聲自己」、「呢個係階段性勝利」，然後陸續和平散去，第二日大家照常返工返學……你地就得到捐款養住個黨/團體，班搞手出糧有著落喇，咁我地得到D咩呢又？
#左膠 #畀D掌聲自己 #階段性勝利 #和理非非 #仲要小組討論先 #永續嘉年華式遊行抗爭
註：
〈聞「收回審批權」即兇市民，林鄭亂加紅線 單程證變禁忌話題〉，蘋果日報，2018–9–10
(2017–12–3)
傳送門：西米Go昔日文章
