Member-only story
意外年年有，中國人特別多！
我唔係講緊2011年溫州高鐵列車相撞（註一）、2015年天津化學品倉庫大爆炸（註二）呢類睇落都有幾成真既意外。（Well，係中國呢個乜都有可能假，只有騙子才是真的既國度，應該無人100% sure呢個真係「純粹意外」架喇！）我係指果D一報出黎，涉及中國名人/土豪/官員「非正常死亡」，即刻引發大家無限想象力既所謂「意外」！
呢，好似近年冒起，積極併購擴張，無論資金來源同幕後股東都非常神秘既「海航集團」。其董事長王健可以無啦啦係法國龍友癮發作，爬上一幅矮牆拍攝鄉村風景，唔小心失足，咁就跌死左（註三）。
原來，連同王健在內有十二位股東簽左 「自願簽署捐贈協議」，佢地離職/離世之後，會將所持海航股份捐晒去「海航慈航基金會」。
大家睇睇上面張股權分佈圖，成個集團，除左「慈航基金會」，就係果十二個股東。簡單講，假以時日，呢十二個始創人/高級管理層死晒，成個集團就自動歸「慈航基金會」所有。咦？幾時開始中國人思想變得咁開通架？肯學洋人Bill Gates、巴菲特咁捐身家，唔留畀後人。聽落完全唔make sense喎！定係，呢十二個人只係一堆泊車仔，聽聽話話幫金主做事，仲可以盡享榮華富貴，人唔係度，就要「還」返畀金主。今次王健無啦啦意外跌死，嘿嘿！我估係有人（想）唔聽話，又知得太多，所以要佢提早拜拜喇。
Anyway，呢類意外，同2012年李旺陽腳不離地可以吊頸自盡（註四），以及之後一連串發生係看守所，富有中國特色既「創意」死法同出一 轍：
雲南李蕎明「玩捉依因撞牆死」、廣東茂名市戚業強「蓋被子悶死」、江西九江市李文彥「做噩夢死」、福建福州市溫龍輝「床上摔下死」、福建福清市陳姓學生「睡姿不對死」、山東文登市于維平「摳粉刺死」、江西修水縣陳緒金「摔跤死」、河南魯山縣王亞輝「喝開水死」、湖北公安縣薛宏福「洗臉死」……等等
普京同金正恩好應該向佢地老朋友學下野啦，殺人滅口唔使下下出神經毒劑咁高調架！。
#被意外跌死 #海航 #中國國情
註：
- 〈溫州高鐵 毀屍滅跡 全球瞠目結舌〉，台灣蘋果日報，2011–7–27
- 〈天津大爆炸，後來呢？〉，轉角新聞，2015–12–24
- 〈中國海航董事長王健爬牆拍照意外跌下逝世〉，中國報，2018–7–4
- 〈李旺陽驗屍定調「上吊自殺」〉，台灣蘋果日報，2012–7–13
(2018–7–4)
傳送門：西米Go昔日文章2019
