Member-only story
正當律政司司長「潘鄭若驊」知法犯法，由僭建衍生出黎既一串問題沒完沒了，親共/親政府集團都頭痛緊點樣小罵大幫忙（立法會補選臨近，班保皇黨為免得失選民，又唔可以完全唔出聲），點樣大事化小。
而家佢地見到有兩個浸大學生，因為不滿校方的普通話畢業要求，早前佔領學校語言中心並爆粗指罵教師。「尊師重道」呢塊道德高地，仲唔空群而出齊搶佔，拿拿臨上綱上線，轉移牛頭角順嫂呢類師奶、大叔既視線？
班愛國愛黨人士（無論建制內如民建聯、文匯大公東方TVB；定建制外如周融、愛字頭），都唔係第一次用此等手法去淡化政府醜聞：早前佔領旺角期間，小學教師林慧思用英文爆粗斥責在場警員執法不公，佢地已經群起而攻，搞到人地無左份工。
今次我睇到既係照辦煮碗，用同一手法企圖去搞果兩個肯企出黎對抗院校赤化既大學生。果兩個學生領袖無衝擊會場，無同教職員有身體接觸，無破壞公物，純粹講粗口，琴日已經不經聆訊，即時被校長錢大康罰停學。學校極速做野，以此殺雞儆猴，令其他學生不敢發聲。
呢度讓我節錄香港浸會大學應用倫理研究中心主任羅秉祥琴日既一段文章：
「年輕人爆粗，至少還率直。社會賢達或政府官員講話溫文儒雅，但若充滿謊言歪理及說非成是，我感到更大冒犯。欲借浸大學生會會長爆粗而想把浸大學生會置於死地，這個舉動反映成人世界的奸詐, … .
大學內紀律嚴明，政府高層內就寬容由知法犯法者來執法；在這個荒謬的社會，教育工作者只能感到氣餒。」
令我感到氣餒既係，主流傳媒日夜播放、宣揚高官權貴既歪理、謊言、語言偽術……講真，仲難聽過粗口！
#浸大
(2018–1–25)
傳送門：西米Go昔日文章
