【三歲定八十】唔好指擬老細會轉死性

大家仲記唔記得，舊年呢個時候，有間本地老牌大公司被人踢爆，公司春茗要員工科水，位位$180？（唔記得唔緊要，可以足本重溫。）

當年單野揚左唔夠幾日，果間公司大老細，李嘉誠二仔李澤楷決定自己掏荷包，請晒幾千員工食呢餐（註一）。對於富二代黎講，面子點都重要過銀紙，區區一百幾十萬，平時跌都跌左。但係「良心」僱主呢個朵，係會跟足佢一世！

好快，一年容易又春茗。大公司員工又有料爆。佢地今年有新玩法，春茗呢，公司請，不過只供指定職級以上既職員報名，太低層既，連份memo都未見過。人事部仲要聲稱座位有限，唔係你想去就有，報完名要抽籤！

好耐之前，李生為左幫女友Isabella出頭，公開話過某城中富豪「坐過監同留過案底」都無「改過自新」（註二）。其實，佢今勻有口話人無口話自己。舊年春茗撞過板，一樣死性不改。今年繼續孤鳩寒，唔落畢直。但又怕班低層員工發窮惡，好似舊年咁爆響口、周圍唱、落多次老細面喎！唯有學特區政府咁，直頭DQ晒提出問題既人。唔預佢地，就無眼屎乾淨盲。班高層醒呀今次！反正咩「員工係公司最重要資產」呢D bullshit，今時今日係香港都無人信架啦。你有hard feeling？Who cares？

春茗又好，annual dinner又好，係公司一年一度慰勞伙記既聯誼活動。都係果句啦，一百幾十萬，唔好話咁大間公司，就算李生自己平時跌都跌左啦，點解仍然堅持要做得咁肉酸呢？唔通為左舊年失去既面子，連今年既面子都唔要？

#點解一間大公司要做得咁寒酸
#平時都夠刻薄
#人工又唔加 #庹縮

註：

1. 〈電盈、香港電訊員工春茗要自費 盛惠$180〉，蘋果日報，2018–2–22

2. 〈公開撐Isabella 李澤楷「以為坐過監嘅人會改過新〉，蘋果日報，2008–11–4

(2019–4–9)

傳送門：西米Go昔日文章2019

傳送門：【度縮老細】中大嫌貴，當年無邀請霍金去演講

傳送門：【首富教路】要「高調咁做Show」，同時「低調咁度縮」。