Member-only story
「西營盤第二街83號西園永翠閣23樓F室，實用面積367呎，兩房一廳單位，昨日揭發三屍命案，一對姓羅夫婦攜同七歲兒子在住所內燒炭自殺身亡。涉案單位由一名姓黃男子於2012年以369萬元買入，市值約七百萬。持貨7年升值約一倍。」
香港樓價連續多年世界第一，頭等大事，自然人人關心。親戚拜年、舊同學聚會、港男港女求偶相睇、不論場合大小，話題離唔開一個「樓」字。有點樣既受眾，自然就有點樣既傳媒。所以，唔知由幾時開始，每逢有兇案，紙媒記者一定詳細交代涉案單位既背景資料（高中低層、尺數、市值）for your information。呢種報道手法，已成本地獨有既人文風景。
岩既，香港地，日日都有人死。見報既一日幾單，記者事忙/收唔切風，無見報既不知凡幾。睇得多，大家麻木晒。況且，自己都未顧得掂，邊有閒情逸致，同情/深究人地為錢、為情、為學業、抑或精神/健康有問題而自尋短見呢？
香港人不嬲務實（或現實）。三唔識七既人係生係死，wfc？最緊要唔好阻住佢地搵食。咩叫「搵食」？一切有錢賺既活動都可歸類為搵食。除左返工同炒呢樣果樣，買樓都一樣係搵食。「樓」，對大部份香港人黎講，仲要係一生人最重要既搵食工具。我敢講，一個正常打工仔打一世工賺到既錢，都未必夠一層樓係呢個持續十幾年既升浪賺得多！你話喇，幢樓有兇案，街坊點會唔心慌？
租客係業主揀，自己個單位變凶宅就話唔好喊啫。隔離左右係無辜架嘛！好似今次單野，三屍滅門，夠晒猛，樓價跌三至四成起碼，七百幾萬樓，大拿拿二百幾萬咁就無左。至於同層一梯八伙，七個街坊就位位唔見百幾萬（凶宅同層通常比市價平一至兩成）。想轉售為租咩？只會淪為教徒/南亞人之選，租金當然就……嘿嘿。就算係西營盤呢D舊區，街坊有再濃既人情味都難免變得勢利同現實，而口出怨言。因為佢地自己都有物業，將心比己，自然同情業主多過事主。講野聽落涼薄冷血，但貼地。
講起涼薄，遠遠都未夠無線〈東張西望〉既監製。其中有集佢地探討凶宅case，主持宋熙年話：
「如果可以放下迷信，理性分析，便知道這（投資凶宅）是一個大商機！」
凶宅無得造按揭，要現兜兜full paid咁買。有能力把握呢D「商機」既，一定係有大把閒錢既投資者。咁既稿都出得街，證明香港地，呢種「成功」人士好多。點解？正如我一開頭所講，有點樣既受眾，自然有點樣既傳媒嘛！
#舊區濃濃既人情味 #勢利的香港人 #窮得只剩下錢
伸延閱讀：
〈單位變凶宅 街坊心慌慌〉，蘋果日報，2019–2–26
(2019–2–26)
傳送門：西米Go昔日文章2019
傳送門：為何香港不再認真做事？
